RTI ಗೆ ಕೆನರಾ(Canara) ಬ್ಯಾಂಕ್‍ನಿಂದ ಬಂದ ಉತ್ತರಗಳು

 

ಪ್ರಶಾಂತ್ ಸೊರಟೂರ ಎಂಬುವವರು 2013 ರಲ್ಲಿ ಕೆನರಾ ಬ್ಯಾಂಕ್ ಶಾಖೆಗಳ ನಿಯಮಗಳು ಮತ್ತು ಭಾಷಾ ನೀತಿ ಕುರಿತು ಮಾಹಿತಿಯನ್ನು ಕೋರಿ ಮಾಹಿತಿ ಹಕ್ಕು ಕಾಯ್ದೆ (RTI) ಅಡಿಯಲ್ಲಿ ಒಂದು ಅರ್ಜಿ ಹಾಕಿದ್ದರು. ಅದರ ಸಾರಾಂಶ ಹೀಗಿದೆ.

ಮಾನ್ಯರೇ,

ಮಾಹಿತಿ ಹಕ್ಕು ಕಾಯ್ದೆ (RTI) ಅಡಿಯಲ್ಲಿ ಕರ್ನಾಟಕದಲ್ಲಿರುವ ಕೆನರಾ (Canara) ಬ್ಯಾಂಕ್ ಶಾಖೆಗಳ ಕುರಿತು ಈ ಕೆಳಗಿನ ಮಾಹಿತಿಗಳನ್ನು ಕೋರುತ್ತಿರುವೆ.

1) ಕರ್ನಾಟಕದ ನಿಮ್ಮ ಬ್ಯಾಂಕ್ ಶಾಖೆಗಳಲ್ಲಿ ಈ ಕೆಳಗಿನ ಅರ್ಜಿ ಇಲ್ಲವೇ ನಮೂನೆಗಳು ಕನ್ನಡದಲ್ಲಿ ಇವೆಯೇ?

  • ಎಲ್ಲ ಬಗೆಯ ಹೊಸ ಖಾತೆ ತೆರೆಯುವ ಅರ್ಜಿ (ಉಳಿತಾಯ, ಚಾಲ್ತಿ ಇತ್ಯಾದಿ)
  • ಮನೆ ಸಾಲ ಪಡೆಯುವ ಅರ್ಜಿ
  • ವಾಹನ ಸಾಲ ಪಡೆಯುವ ಅರ್ಜಿ
  • ಶಿಕ್ಷಣ ಸಾಲ ಪಡೆಯುವ ಅರ್ಜಿ
  • ನಾಮ ನಿರ್ದೇಶನದ ಅರ್ಜಿ
  • ನಿಶ್ಚಿತ ಠೇವಣಿ ಅರ್ಜಿ ಮತ್ತು ಠೇವಣಿ ಇಟ್ಟ ಬಗ್ಗೆ ಬ್ಯಾಂಕ್ ಕೊಡುವ ಒಪ್ಪಿಗೆಯೋಲೆ (Term Deposit Advice)
  • ಹಣ ಪಡೆಯುವ ಮತ್ತು ತುಂಬುವ ಚೀಟಿ
  • ಇನ್ನೊಂದು ಬ್ಯಾಂಕ್ ಖಾತೆ ವರ್ಗಾವಣೆ ಅರ್ಜಿ
  • ಚೆಕ್
  • ಮನೆ ವಿಳಾಸ ಬದಲಿಸುವ ಅರ್ಜಿ
  • ಡಿಮ್ಯಾಂಡ್ ಡ್ರಾಫ್ಟ್
  • ಎ.ಟಿ.ಎಂ ಕಾರ್ಡ್ ಪಡೆಯುವ ಅರ್ಜಿ

2) ಮೇಲೆ 1) ರಲ್ಲಿ ಕೇಳಿದ ಮಾಹಿತಿಗೆ ಯಾವುದೆಲ್ಲ ಅರ್ಜಿ ನಮೂನೆಗಳಿಗೆ ನಿಮ್ಮ ಉತ್ತರ “ಇಲ್ಲ” (ಅಂದರೆ ಕನ್ನಡ ಬಳಕೆಯಾಗುತ್ತಿಲ್ಲ) ಅನ್ನುವುದಾಗಿದೆಯೋ ಅಂತಲ್ಲಿ ಕನ್ನಡ ಬಳಸಲು ಇಲ್ಲವೇ ಕನ್ನಡ ಬಳಸದಿರುವುದಕ್ಕೆ ವಿನಾಯಿತಿಯನ್ನು (Exemption) ನಿಮ್ಮ ಬ್ಯಾಂಕ್ ನ ಆಡಳಿತ ಮಂಡಳಿ ಇಲ್ಲವೇ ಭಾರತೀಯ ರಿಸರ್ವ್ ಬ್ಯಾಂಕು ಹೊರಡಿಸಿದ ಆದೇಶಗಳು, ಸುತ್ತೋಲೆಗಳು ಇಲ್ಲವೇ RTI Act, 2005 ರಲ್ಲಿ ತಿಳಿಸಿರುವಂತೆ ಇನ್ನಾವುದೇ ಸಾಮಗ್ರಿ ರೂಪದಲ್ಲಿರುವಂತಹ (material form), ತೀರ್ಮಾನಗಳ ಅಡಿಯಲ್ಲಿ ಹೀಗೆ ಮಾಡುತ್ತಿದ್ದರೆ (ಕನ್ನಡ ಬಳಸದಿರುವಿಕೆ) ಅಂತಹ ಆದೇಶಗಳು, ಸುತ್ತೋಲೆಗಳು ಇತ್ಯಾದಿಗಳ ಪ್ರತಿಯೊಂದನ್ನು ದಯವಿಟ್ಟು ಕಳಿಸಿಕೊಡಿ.

3) ಕರ್ನಾಟಕದಲ್ಲಿರುವ ಗ್ರಾಹಕರೊಡನೆ ನಿಮ್ಮ ಬ್ಯಾಂಕು ಅನುಸರಿಸುವ ಭಾಷಾ ನೀತಿಗೆ (Language Policy) ಹೊಂದಿಕೊಂಡ ಆದೇಶಗಳು, ಸುತ್ತೋಲೆಗಳು ಇಲ್ಲವೇ RTI Act, 2005 ರಲ್ಲಿ ತಿಳಿಸಿರುವಂತೆ ಇನ್ನಾವುದೇ ಸಾಮಗ್ರಿ ರೂಪದಲ್ಲಿ ಇದ್ದರೆ ಅವುಗಳ ಪ್ರತಿಯೊಂದನ್ನು ದಯವಿಟ್ಟು ಕಳಿಸಿಕೊಡಿ. (ಕರ್ನಾಟಕದ ನಿಮ್ಮ ಬ್ಯಾಂಕುಗಳಲ್ಲಿ ಯಾವ, ಯಾವ ಭಾಷೆಗಳನ್ನು ಬಳಸಬೇಕು ಅನ್ನುವಂತ ಸಾಮಗ್ರಿ ರೂಪದಲ್ಲಿರುವ ಮಾಹಿತಿಗಳು)

4) ಕೆನರಾ ಬ್ಯಾಂಕಿನ ಕರ್ನಾಟಕದಲ್ಲಿರುವ ಶಾಖೆಗಳು ಎಷ್ಟು ಮತ್ತು ಕರ್ನಾಟಕದ ಹೊರಗಡೆ ಇರುವ ಶಾಖೆಗಳು ಎಷ್ಟು ಎನ್ನುವ ಮಾಹಿತಿಯನ್ನು ದಯವಿಟ್ಟು ತಿಳಿಸಿ.

ಇದಕ್ಕೆ ಕೆನರಾ ಬ್ಯಾಂಕ್‍ನಿಂದ ಬಂದ ಉತ್ತರ ಹೀಗಿದೆ.

1) RTI act 2005 sec 2(f) ಪ್ರಕಾರ ಇದು ಪ್ರಶ್ನಾರ್ಥಕ ರೂಪದಲ್ಲಿರುವುದರಿಂದ ಇದರ ಬಗ್ಗೆ ಮಾಹಿತಿ ನೀಡಲು ಸಾದ್ಯವಿಲ್ಲ.

2) ನಾವು ಗಮನಿಸಿರುವ ಪ್ರಕಾರ, ನೀವು ಕೇಳುತ್ತಿರುವ ಸ್ಪಷ್ಟನೆ ಮಾಹಿತಿಯಾಗಿಲ್ಲದಿರುವುದರಿಂದ ಅದಕ್ಕೆ ಉತ್ತರಿಸಲು RTI act 2005 sec 2(f) ಪ್ರಕಾರ ಸಾಧ್ಯವಿಲ್ಲ.

3) ನಮ್ಮದು ಸಾರ್ವಜನಿಕ ವಲಯದಬ್ಯಾಂಕ್ ಆಗಿರುವುದರಿಂದ ಕೇಂದ್ರ ಸರ್ಕಾರ ಮತ್ತು ಅರ್.ಬಿ.ಐ(RBI) ರೂಪಿಸಿರುವ ಭಾಷಾ ನೀತಿಯನ್ನು ಪಾಲಿಸುತ್ತಿದ್ದೇವೆ. ಹಾಗಾಗಿ ನಮ್ಮ ಬ್ಯಾಂಕಿನ ಎಲ್ಲ ಶಾಖೆಗಳಲ್ಲೂ ಎಲ್ಲ ನಾಮಫಲಕಗಳೂ ತ್ರಿಭಾಷಾ ಸೂತ್ರ ಅನ್ವಯದಂತೆ ಹಿಂದಿ ಇಂಗ್ಲಿಷ್ ಮತ್ತು ಪ್ರಾದೇಶಿಕ ಭಾಷೆಗಳಲ್ಲಿ ಇರುತ್ತವೆ, ಮತ್ತು ಎಲ್ಲ ತರಹದ ಅರ್ಜಿಗಳನ್ನು ಹಿಂದಿ ಮತ್ತು ಇಂಗ್ಲಿಷ್‍ನಲ್ಲಿ ಮುದ್ರಿಸಲಾಗಿದೆ. ಪ್ರಾದೇಶಿಕ ಅಗತ್ಯಗಳನ್ನು ಮನದಲ್ಲಿಟ್ಟುಕೊಂಡು ಕೆಲವು ಅರ್ಜಿಗಳನ್ನು ಪ್ರಾದೇಶಿಕ ಭಾಷೆಗಳಲ್ಲೂ ಅಚ್ಚುಹಾಕಲಾಗಿದೆ. ಉದಾಹರಣೆಗೆ, ಹಣ ತುಂಬುವ ಚೀಟಿಗಳನ್ನು ಆಯಾ ಪ್ರದೇಶಕ್ಕೆ ತಕ್ಕಂತೆ ಎರಡು ಅಥವಾ ಮೂರು ಭಾಷೆಗಳಲ್ಲಿ ಅಚ್ಚು ಹಾಕಿಸಲಾಗಿದೆ.

4) ಕರ್ನಾಟಕದಲ್ಲಿ ನಮ್ಮ ಶಾಖೆಗಳು: 701

ಹೊರರಾಜ್ಯದಲ್ಲಿನ ನಮ್ಮ ಶಾಖೆಗಳು(ಕರ್ನಾಟಕದ ಹೊರಗಡೆ): 2981

ಉತ್ತರದ ಪ್ರತಿಯನ್ನು ಈ ಕೆಳಗೆ ನೋಡಬಹುದಾಗಿದೆ

canara_answer

Posted on December 15, 2015, in RTI. Bookmark the permalink. Comments Off on RTI ಗೆ ಕೆನರಾ(Canara) ಬ್ಯಾಂಕ್‍ನಿಂದ ಬಂದ ಉತ್ತರಗಳು.

Comments are closed.

%d bloggers like this: